تاضفي ن وطان Tadfi n wattan

Ilul-d gh usiru n tazezwlt n Centre imprimerie gh ayt mllul yan udlis amaynu n tmdyazt bahra immimn ifssusn s tguriwin ns d izlan ns. Tadla ad n tmdyazt tamaynut tga tixfddit n umara ngh a3rrim mass Abdslam Bumisr da nn igan iZmuZZal ns zwarnin gh igr n tirra d usnflul iZZu nn gis izlan mmimnin, ig wamud ns tujjut n izlan ismurign s sin iskkiln win ulatin d win tfinagh gh yat twckint s ism n: “taDfi n waTTan”, gnt tjddigin n tmdyazin gis mrawt (10) d ifrawn n tasna ns 68. Yawi-d mass Med Oussous gh tzwart lli iskr i twckint ad: “Tamdyazt n Bumisr ilmma tga fghnit, tga aDrf ns sis iZlin ntta gh igr n tirra, tlla gis tisnt n uzayku, tili gis tamimt n umarg aqbur ilan tujjut n wakal amazigh d ighwman n flulu, ar gis kkatn iznZarn n umaynu d tgrawla, wann yaqqran izlan n bumisr ar nit ittssn mad igan ad iddr gr ighwmdan n taDfi d waTTan, gr tsukkas n tamimt d ungaZ, acku awal ns yaDfutn, tazra n tguriwin ns ittwagran s tgharast n umdyaz issgrdn izlan, ar kffisn amud n taDfi d ufrujju gh ulawn, ssnfsn tuga n iman s unZar nnsn, macc usin iskturn nnsn anza n waTTann ns d waxbacn n tudrt ighdjajn ns… “ Mass Abdeslam Boumisser iZDa tiguriwin n isyafatn n ugns ns, gr tirZgi nnsnt d tamimt nnsnt s yat tgharast ifssusn immimn d yat tutlayt izdgn d tguriwin yusin kigan d wammakn gn-d ilmma izlan ad ns tugga f talla (l’éxistence) n yan umdyaz imqqurn, yan umdyaz d yugmn gh mnnawt tssiggiwin, iZDarn ad yara s tgharast tatrart ircmn s tiZilt n umarg aqbur d taDfi ns, iga mayann akkw timitar da nn nttafa gh izlan ns lli agh iZZaDn ulawn s kigan n taDfi d waTTan.